Өфөнән Ереванға тура авиарейстар асыла

31 мартта Өфөнән Ереванға тура авиарейстар асыла, осоштарҙы Red Wings авиакомпанияһы башҡара, тип хәбәр итте үҙенең телеграм-каналында Башҡортостандың транспорт һәм юл хужалығы министры Александр Клебанов.

"Red Wings авиакомпанияһы менән берлектә эш алып барҙыҡ. Ошо йүнәлештәге беренсе рейсты 31 мартта асырға уйлайбыҙ, – тип яҙҙы республиканың транспорт министры. – Ереванға бөтә уңайлыҡтары булған SSJ100 лайнерҙары оса башлай".

Әрмәнстанға осоштар – йома, кире йүнәлештә иһә шәмбе көндәрендә башҡарыла.

"Әйткәндәй, Әрмәнстандың баш ҡалаһы – Red Wings авиакомпанияһының маршрут селтәрендә Өфөнән бишенсе йүнәлеш. Авиакомпания шулай уҡ Алматы, Анталья, Минск һәм Истанбул ҡалаларына оса", – тип өҫтәне Александр Клебанов.

Сығанаҡ: "Башинформ".