Башҡортостанда 2022 йылда “Мәғарифтың мәктәп системаларын модернизациялау” программаһы буйынса 63 мәктәп бинаһы ремонтланған. Биналарҙың ҡыйығын яңыртҡандар, кластарҙы һәм спорт залдарын тәртикә килтергәндәр. Бының өсөн 3,5 миллиард һум аҡса бүленгән: 2,9 миллиарды – федераль бюджеттан, 600 миллионы – республика ҡаҙнаһынан.
2023 йылда иһә республикала был программаға 77 мәктәп инәсәк, уларҙы ремонтлауға 4,3 миллиард һум тотоноу күҙаллана. 3,6 миллиард һумы – федераль бюджеттан, 700 миллион һумы республикабыҙҙан биреләсәк.
– Был бик ҙур сумма, республикаға миллиард һумдар килә. Заявкалар йыйылды, ремонт талап ителгән объекттар һайланды. Ҡәтғи ваҡыттар билдәләнде. Әле муниципаль контракттар төҙөлә, – ти республикабыҙҙың мәғариф һәм фән министры Айбулат Хажин.
Министр билдәләүенсә, муниципалитет, мәктәпте капиталь ремонтлауға подряд ойошмаһын һайлау менән бер рәттән, төҙөлөш барышын күҙәтеүгә лә мотлаҡ контракт төҙөй. Ата-әсәләр ҙә ремонт үтәлешенә контроллек итә.
Федераль программа мәктәп биналарын ремонтлау менән бергә кәрәкле йыһаздар һатып алыуҙы һәм уҡытыусыларҙың квалификацияһын күтәреүҙе лә күҙ уңында тота.
Фото "Башинформ"дан алынды.