Мәжит Ғафури исемендәге башҡорт дәүләт драма театры “Ҙур гастролдәр”гә юлланасаҡ

– «Ҙур гастролдәр»ҙә беренсе тапҡыр ғына ҡатнашмайбыҙ. 2021 йылда был программа ярҙамында Ҡырым Республикаһының Ҡырым-татар музыкаль театры менән алмаш гастролдәр ойошторолдо. Быйыл башҡорт театр сәнғәте менән Ҡабарҙы-Балҡар Республикаһы тамашасылары танышасаҡ - сентябрҙә беҙ Нальчик ҡалаһының Максим Горький исемендәге Рус драма театры сәхнәһендә сығыш яһаясаҡбыҙ. Ә апрель айында театр коллективын үҙебеҙҙә көтөп ҡалабыҙ. Бындай гастролдәр, ғәҙәттә, өс-дүрт көн дауамында бара”, - тине Иршат Ишбулат улы.  

 «Ҙур гастролдәр» программаһының төбәк-ара йүнәлеше 2017 йылда асыла. Ул - Мәскәү һәм Санкт-Петербургтың билдәле театрҙары, шулай уҡ илебеҙҙең аҙ билдәле театрҙары ҡатнашҡан ҙур проекттарҙың береһе. Программа театр коллективтарына күрше өлкәләргә генә түгел, ә алыҫ төбәктәргә, шулай уҡ Мәскәү, Санкт-Петербург, Новосибирск, Пермь, Екатеринбург һәм Ярославль кеүек бай тарихлы театр сәхнәләрендә сығыш яһарға, тәжрибә менән уртаҡлашырға мөмкинселек бирә.  "Ҙур гастролдәр" федераль проекты театрҙарҙың үҙ-ара бәйләнешен киңәйтеп, уртаҡ маҡсаттар ҡуйыуына булышлыҡ итеп кенә ҡалмай, театр сәнғәтен яңы кимәлгә лә күтәрә.