Етем балаларға пособиелар 10 процентҡа арта

Башҡортостан Дәүләт Йыйылышы «Опекундарға (попечителдәргә) бала ҡарау өсөн аҡса түләү тәртибе һәм күләме тураһында» Башҡортостан Республикаһы законының 5-се статьяһына үҙгәрештәр индереү тураһында» закон ҡабул итте. Был хаҡта республика парламентының матбуғат хеҙмәте хәбәр итә.

2023 йылдың 1 ғинуарынан балаларҙы тәрбиәгә алған һәм патронат ғаиләләргә етем һәм ата-әсә ҡарауынан мәхрүм ҡалған балаларҙы ҡарау өсөн айлыҡ пособиелар күләме 10 процентҡа арттырыла. Быйыл пособиелар индексацияланманы, ә быға тиклем 4 процентҡа арттырылғайны.

Шулай итеп, өс йәшкәсә бала ҡараған өсөн пособие – 7143 һумдан 7857 һумға, өс йәштән өлкәнерәктәр өсөн иһә 6868 һумдан 7555 һумға тиклем арта. Үҫеш йәһәтенән ҡалышҡан балаларға арттырылған пособиелар ҙа 10 процентҡа индексациялана: өс йәшкәсә балаға – 9428 һумға хәтлем, өс йәше тулған һәм унан олораҡ балаға – 9066 һумғаса.

Парламент рәйесе Константин Толкачев әйтеүенсә, законды ғәмәлгә ашырыу өсөн 100 миллион һумға яҡын аҡса кәрәк. Был сараларҙы финанслау кисә депутаттар беренсе уҡыуҙа ҡабул иткән «2023 йылға һәм 2024-2025 йылдарҙың план осорона Башҡортостан Республикаһы бюджеты тураһында» закон проектында ҡаралған.

Сығанаҡ: “Башинформ”.