Өфөлә – оло форум

Бөгөн, Өфөбөҙҙөң “Торатау” Конгресс-холында “Сиктәрҙе емереп” I Бөтә Рәсәй форум-күргәҙмәһе эшләй башланы. Был оло форум реабилитация һәм инвалидлыҡты профилактикалау, реабилитация техникаһы һәм саралары, ҡулай мөхит өсөн яйланмалар етештереүселәр һәм ҡайтартыусылар менән хеҙмәттәшлекте ойоштороу мәсьәләләренә арналған.

Унда илебеҙҙең Мәскәү, Санкт-Петербург ҡалаларынан, Владимир, Ленинград, Мәскәү, Новосибирск, Һарытау, Свердловск һәм Силәбе өлкәләренән, шулай уҡ Краснодар, Приморье крайҙарынан, Башҡортостан һәм Татарстандан реабилитация саралары етештереүсе 50-нән ашыу предприятие ҡатнаша.

Эшлекле программа сиктәрендә 30 дискуссия майҙансыҡтары эшләйәсәк, түңәрәк өҫтәлдәр, конференциялар һәм оҫталыҡ дәрестәре үткәреләсәк.

Форумдың төп сараһы – пленар ултырыш “һаулыҡ мөмкинлектәре сикләнгән кешеләрҙе реабилитациялау. Яңы һынауҙар һәм ҡарарҙар” тигән темаға арнала.

Бөгөн Мәжит Ғафури исемендәге Башҡорт академия драма театрында “Сиктәрҙе емереп” балалар ижадының төбәк-ара инклюзив фестивале гала-концерты буласаҡ. Шаршамбы, 9 ноябрҙә, халыҡ-ара гроссмейстер Тамара Танһыҡҡужина һаулыҡ мөмкинлектәре сикләнгән балалар менән шашка турниры үткәрә, шулай уҡ “Әсә йөрәге” әсәләр советы һәм Ортомод компанияһы инклюзив мода күрһәтеүҙе ойоштора.

Бынан тыш, 8 ноябрҙән 10 ноябргә тиклем Конгресс-холда коммерция булмаған ойошмалар тәҡдим иткән уникаль тауарҙарҙың хәйриә йәрминкәһе уҙғарыла. Шулай уҡ табиптарҙан, министрлыҡтар һәм ведомстволар белгестәренән һаулыҡ мөмкинлектәре сикләнгән кешеләргә ярҙам саралары хаҡында бушлай консультациялар алырға мөмкин буласаҡ.