Махсус хәрби операцияла ҡатнашыусыларҙың ғаиләләренә «Ғаилә» үҙәктәре ярҙам итә

Өлөшләтә мобилизация иғлан ителгәндән һуң Башҡортостандың «Ғаилә» үҙәктәренә махсус хәрби операцияла ҡатнашыусыларҙың 800-ҙән ашыу ғаилә ағзаһы мөрәжәғәт иткән, тип белдерҙеләр Ғаилә, хеҙмәт һәм халыҡты социаль яҡлау министрлығының матбуғат хеҙмәтендә.

Ошо үҙәктәрҙең белгестәре төрлө ярҙам саралары күрһәтеү мәсьәләләре буйынса 900-ҙән ашыу консультация үткәргән, 86 хәрби хеҙмәткәрҙең ғаилә ағзаһына психологик ярҙам күрһәтелгән.

«Меңдән ашыу кешегә аҙыҡ-түлек, кейем-һалым, балалар өсөн гигиена әйберҙәре менән ярҙам иттеләр. Белгестәр бөтәһе 839 ғаиләгә барҙы, – тинеләр министрлыҡта. –  Махсус хәрби операцияла ҡатнашыусыларҙың ғаилә ағзаларының 131-е өйҙә хеҙмәтләндерелә башланы. Уларҙың 118-е – оло йәштәгеләр, һигеҙ инвалид, шулай уҡ инвалид бала тәрбиәләгән биш ғаилә».

Башҡортостандың «Ғаилә» үҙәктәренең берҙәм телефоны: 8-800-347-5000. Тулыраҡ мәғлүмәтте республиканың Ғаилә порталынан алырға мөмкин.

Сығанаҡ: «Башинформ».