Яңы музей асыу тиҙләтелә

Кисә Башҡортостан Башлығы Радий Хәбиров Евразия күсмә цивилизациялар музейын асыу буйынса эш төркөмө кәңәшмәһен үткәрҙе.

Билдәле булыуынса, музей Шишмә районындағы Турахан кәшәнәһе янында урынлашасаҡ.

“Архтамға” эксперт-проект бюроһының генераль директоры Рөстәм Әлибаев буласаҡ музейҙың архитектура концепцияһы менән таныштырҙы. Күсмә цивилизациялар музейы биналары комплексы ошо төбәктең ландшафтына тап килергә һәм төп объект – Турахан кәшәнәһенең әһәмиәтен сағылдырырға тейеш, тип билдәләне ул.

Евразия ғилми-белем биреү үҙәге менән берлектә буласаҡ музей комплексы белгестәрен әҙерләү ойоштороласаҡ.

Музей эргәһендә визит-үҙәк, “оҫталар ҡалаһы”, ипподром менән ат спорты үҙәге, ҡымыҙ йорто, шулай уҡ дөйөм туҡланыу ойошмалары, туристик-рекреация объекттары урынлашасаҡ.

Башҡортостан Башлығы биләмәне транспорт менән тәьмин итеү, шулай уҡ юл буйы сервисын үҫтереү мөмкинлеген ҡарарға ҡушты.