Республикабыҙҙың күп функциялы үҙәге – Бөтә Рәсәй конкурсы еңеүсеһе

 Баш ҡалабыҙ Өфөлә бөгөн күп функциялы үҙәктәрҙең VI Бөтә Рәсәй форумы үҙ эшен дауам итте. Форумдың икенсе көнө программаһы ла бик бай һәм йөкмәткеле булды.

Сарала ҡатнашыусыларға Рәсәй Хөкүмәте рәйесе Михаил Мишустин үҙенең сәләмләү һүҙҙәрен ебәрҙе. Ул күп функциялы үҙәктәр эше һөҙөмтәһендә илдә күп бюрократик процедуралар кәмеүен, дәүләт хеҙмәттәре уңайлы һәм тиҙ күрһәтелеүен, һәр кешенең үҙ тормошо өсөн мөһим мәсьәләләрҙе етеҙ хәл итеү мөмкинлегенә эйә булыуын билдәләне.

Форумға йыйылыусыларҙы шулай уҡ Рәсәйҙең иҡтисади үҫеш министры Максим Решетников сәләмләне. Ул тәүге күп функциялы үҙәк асылғандан 15 йыл үтеүен һәм ошо ваҡыт эсендә граждандарҙың һәм йәмғиәттең үҙ-ара бәйләнешенең уникаль системаһы булдырылыуын әйтеп үтте. Көн һайын күп функциялы үҙәктәргә 630 меңдән ашыу килә.

Башҡортостан Хөкүмәте Премьер-министры Андрей Назаров дәүләт хеҙмәттәре күрһәтеү өлкәһендә алға китеш мөһимлеген билдәләне. “Һеҙҙең ҡулдар менән яңы – һанлы киләсәк булдырыла. Бының өсөн һеҙгә рәхмәт белдерергә теләйем. Ошондай процеста ҡатнашыусы булыу – ҙур бәхет. Маҡсатыбыҙ ябай – Башҡортостанда кешеләр тормошо өсөн иң уңайлы мөхит булдырыу, күп функциялы үҙәктәрҙән башҡа был мөмкин түгел”, – тине ул.

Форумда 2021 йыл йомғаҡтары буйынса “Иң яҡшы күп функциялы үҙәк” конкурсы лауреаттарын бүләкләү булды. Башҡортостандың Күп функциялы дәүләт һәм муниципаль хеҙмәттәр күрһәтеүсе үҙәк республика дәүләт автономиялы учреждениеһы “Иң яҡшы төбәк күп функциялы үҙәк селтәре” номинацияһында бүләккә лайыҡ булды. Ҡатнашыусыларҙы үҙәк эшмәкәрлегенең бөтә яҡлап һөҙөмтәлелеге, ойоштороуҙың һәм идара итеүҙең алдынғы алымдар ҡулланылыуы, заманса һанлы технологиялар файҙаланылыуы буйынса баһаланылар.

Альберт Заһиров фотоһы.