Һаулыҡ һәм туризм фестивале була

23-24 июлдә  Ҡырмыҫҡалы районында Бөтә Рәсәй «Һаулыҡ һәм туризм» сәләмәтләндереү тәжрибәләре фестивале үтә.

Сара Башҡортостанда тәүге тапҡыр ойошторола һәм ул йыл һайын үткәрелеүсе дискуссия, фәнни, күргәҙмә майҙансығына әүереләсәк. Уны ойоштороусылар булып Мунсала сабыныу белгестәренең милли федерацияһы булышлығында Башҡортостан Хөкүмәте тора.

Фестивалдә Башҡортостандан һәм Рәсәй субъекттарынан туризм өлкәһендәге 1000-дән ашыу белгес ҡатнаша. Улар туризм өлкәһенә инвестициялар йәлеп итеү, физик һәм рухи көстө тергеҙеү өсөн эске, атап әйткәндә, рекреацион туризмды үҫтереү мәсьәләләрен тикшерә. Фестивалдең төп темаһы «Туристик өлкәлә импортты алмаштырыу» пленар ултырышында ҡараласаҡ. «Рәхәттә» тәүге мунса фестивален уҙғарыу төп сараларҙың береһе булмаҡсы.