Екатеринбургта башҡорт һылыуҙарына арналған күргәҙмә бара

Екатеринбург ҡалаһында башҡорт милли кейемендәге башҡорт ҡыҙҙарының портреттары күргәҙмәһе асылды. Уларҙы Евгений Гладиновтың художество студияһы ойошторған оҫталыҡ дәрестәре барышында Свердловск рәссамдары төшөргән. Проект Башҡортостан Республикаһының Халыҡтар дуҫлығы йорто филиалы - Свердловск өлкәһендәге Башҡорт тарихи-мәҙәни үҙәге һәм «Беҙ бергә» мәҙәни проекттар һәм башланғыстар үҙәге ярҙамында тормошҡа ашырылған.

"Башҡорт ҡатын-ҡыҙының наҙлы ла, көслө лә яҡтарын сағылдырған уңышлы проект килеп сыҡты. Хәҙер ошо картиналарҙы 1-19 июндә Екатеринбург ҡалаһының Горький урамындағы “4а” һанлы  йортта урынлашҡан «Рәсәй тураһында һөйөү менән» сәнғәт күргәҙмәһендә күрергә мөмкин", - тип хәбәр итте Башҡортостан Республикаһының Халыҡтар дуҫлығы йорто филиалы етәксеһе, «Беҙ бергә» мәҙәни проекттар һәм башланғыстар үҙәге директоры Светлана Ҡолмырҙина.

"Барыһы ла бик матур ине! Светланаға хеҙмәттәшлегебеҙ өсөн ихлас рәхмәтемде белдерәм. Башҡорт – минең өсөн сағыу һәм үҙенсәлекле халыҡ. Башҡорт кейеменең матурлығын һәм сағыулығын күрһәтергә теләнем. Ул мине яугирлыҡ рухы һәм ҡыйыулыҡ, баҫалҡылыҡ һәм ғорурлыҡ кеүек һыҙаттарҙы сағылдырыуы менән йәлеп итте. Оҫталыҡ дәрестәрендә төрлө стилдә һәм төрлө материалда (май, пастель, акварель) яҙған 8 рәссам ҡатнашты. Беҙ башҡа милләттәр өсөн дә портреттар яҙабыҙ. Мари, ҡаҙаҡ халыҡтары вәкилдәренең портретын төшөрҙөк, сыуаштар менән дә эшләргә ниәтләйбеҙ. Әммә башҡорттарҙың портретын яҙыу айырыуса оҡшай. Костюмдарҙың сағыулығы! Ҡыҙыл төҫ! Затлы тире! Көмөш! Портрет яҙыу өсөн Гөлйөҙөм менән Оксана саҡырылды. Эш барышында моделдәр башҡорт халҡының тарихы һәм костюмдың милли элементтары хаҡында бәйән итте, айырым бер сихри мөхит барлыҡҡа килде", - тигән рәссам, художество студияһы етәксеһе Евгений Гладинов.

Фото Башҡортостандың мәҙәни донъяһы сайтынан алынды.