Ғафури районында өлкәндәр һәм инвалидтар өсөн пансионат асылды

 Ғафури районының Татар Һаҫыҡкүле ауылында дәүләт-шәхси партнерлыҡ сиктәрендә өлкәндәр һәм инвалидтар өсөн “Изгелекле йорт” стационар хеҙмәт күрһәтеү пансионаты үҙ ишектәрен асты.

– Рәсәй төбәктәре араһында Башҡортостанда беренселәрҙән булып өлкәндәр һәм инвалидтар өсөн йорт төҙөү дәүләт-шәхси партнерлыҡ  механизмы ярҙамында тормошҡа ашырыла. Был – республикала дүртенсе пансионат, – тип билдәләне Башҡортостан Хөкүмәте Премьер-министры урынбаҫары – финанстар министры Лира Иғтисамова. Татар Һаҫыҡкүле ауылында өлкәндәр һәм инвалидтар өсөн «Изгелекле йорт» пансионаты 1500 квадрат метр майҙанлы элекке мәктәп базаһында урынлашҡан. Ул 32 койка-урынға иҫәпләнгән, 17 урын ҡануниәт нигеҙендә мохтаж тип танылғандарға һәм 15 урын коммерция нигеҙендә буласаҡ. Мохтаждар категорияһына ҡараған граждандар өсөн бюджет урындарын финанслау күләме йыл һайын 2,9 млн. һум тәшкил итәсәк.

Концессионер тарафынан 7,5 млн. һумдан ашыу күләмдә инвестиция йәлеп ителгән һәм килешеүгә ярашлы бинаны төҙөкләндереү һәм йыһаздар һатып алыу буйынса йөкләмәләр үтәлгән. Бинаны түләүһеҙ, ер биләмәһен ташлама менән ҡуртымға биреү шарттарында 25 йылға  концессион килешеү төҙөлгән.

– Койкаларҙың бер өлөшө республика ҡаҙнаһынан финансланып, мохтаждарға бирелһә, ә икенсе өлөшө – түләүле нигеҙҙә. Бындай проекттар иң элек юғары сифатлы хеҙмәтләндереү алырға теләгән кешеләрҙең проблемаһын хәл итә. Беҙҙе айырыуса яңы эш урындары булыуы шатландыра – тәүҙә 13 яңы эш урыны булдырыласаҡ, – тине Башҡортстандың ғаилә, хеҙмәт һәм халыҡты социаль яҡлау министры Ленара Иванова.

Мишкә, Кушнаренко райондарында асылған ошоға оҡшаш проекттар йәшәүгә һәләтлелеген иҫбатланы һәм халыҡтың ышанысын яулап өлгөрҙө.

Фото: Башҡортостан Хөкүмәтенең рәсми сайтынан.