Өфөлә «Яҡташлыҡ көсө» форумы уҙғарыла

Бөгөн Өфөлә «Яҡташлыҡ көсө» форумы үҙ эшен башлай. 

2021 йылда Башҡортостан Башлығы Радий Хәбировтың башланғысы менән «Атайсал» проекты старт алғайны.

Уның сиктәрендә бер йылда республикала йөҙәрләгән балалар һәм спорт майҙансығы төҙөлгән, ике йөҙҙән ашыу шишмә төҙөкләндерелгән, мәсеттәр, ҡорамдар һалынған, ҡала һәм ауыл китапханаларына 3 меңдән ашыу китап тапшырылған, ҡала һәм райондарҙа төрлө саралар үткәрелгән. Меценаттар ошо проекттарҙы тормошҡа ашырыуға 570 миллион һумдан ашыу аҡса йүнәлткән.

«Яҡташлыҡ көсө» форумында «Атайсал» проектына яҡынса йомғаҡ яһала. Сара үҙенең тыуған төйәген үҫтереүгә аҡсаһын, ваҡытын, көсөн һалырға әҙер яҡташтарыбыҙға рәхмәт билдәһе итеп үткәрелә. Форумға 1000-дән ашыу меценат, район-ҡалалар һәм дини ойошмалар вәкилдәре саҡырылған.

Программала — пленар ултырыш, "түңәрәк өҫтәл"дәр, «Атайсал» проектында ҡатнашыусыларҙы бүләкләү.