Иҫерек килеш әхирәттәрен һәләк иткән

Ейәнсура районының Күгәрсен ауылы янындағы Ямашлы һыуһаҡлағысында булған фажиғә республика халҡын тетрәндерҙе.

Республика ЮХХДИ идаралығынан хәбәр итеүҙәренсә,  эскән килеш руль артына ултырған 47 йәшлек ҡатын идара иткән “ВАЗ-2114” автомобиле һыуға ҡолаған һәм батҡан. Юл-транспорт ваҡиғаһы кисә, 18 апрелдә, теркәлгән. Уның һөҙөмтәһендә 1969, 1973 һәм 1986 йылғы өс ҡатын һәләк булған. Ә водитель ҡатын үҙе иҫән ҡалған. Әхирәттәр дүртеһе лә һыуһаҡлағыс янындағы кафела эшләгән.

Асыҡланыуынса, 53 йәшлек ҡатындың – биш, 49 йәшлегенең – өс һәм 36 йәшлегенең ике балаһы әсәйһеҙ ҡалған. 48 йәшлек водителдең иһә өс балаһы бар.

Әлеге ваҡытта был хәл буйынса тикшереү эштәре бара.