Милли кейем көнөндә биҙәүестәр күргәҙмәһе үтәсәк

15 апрелдә көндөҙгө сәғәт 1-ҙә Фәйзи Ғәскәров исемендәге дәүләт академия халыҡ бейеүҙәре ансамбле «Беләҙектәр сыңы» күргәҙмәһе асыласаҡ. Ансамбль музейында сәхнә костюмдарында, биҙәүестәр тағып, иҫтәлеккә фотоға төшөргә лә мөмкин буласаҡ.

Күргәҙмәлә ансамбль репертуарындағы бейеүҙәргә биҙәүестәр коллекцияһы урын аласаҡ. Фәйзи Ғәскәров сәхнәгә ҡуйған үҙенсәлекле биҙәүестәр экспозицияһы, Рәсәй халыҡтарының эксклюзив костюмдары менән танышыу мөмкинлеге буласаҡ. Экспозиция Рәсәй халыҡтарының Милли мираҫы йылына арнала.

 Күргәҙмәне асыу тантанаһына Фәйзи Ғәскәров исемендәге халыҡ бейеүҙәре ансамбленең билдәле артистары, почетлы ветерандары ла киләсәк.

 Фото: "Башинформ"дан.