Бер тәүлектә ковидтан һауығыусылар сирҙе йоҡтороусыларҙан икеләтә тиерлек күп

Башҡортостанда аҙаҡҡы тәүлек эсендә коронавирус 612 ауырыуҙа асыҡланған, ә унан һауығыусылар икеләтә тиерлек күберәк – 1 026. Был турала ковидҡа ҡаршы көрәш буйынса төбәк оператив штабы хәбәр итә.

Республикала ковид йоҡтороусыларҙың дөйөм һаны 272 827 тәшкил итә, шуларҙың 252 533-ө сәләмәтләнеүгә өлгәшкән.

Бөгөнгө көндә стационарҙа дауаланыусылар – 152, шул иҫәптән 98-е – 60 йәштән өлкәнерәк. 14 640 сырхау амбулатор шарттарҙа дауалана, 4 184-е – 60-ты уҙған олатай һәм өләсәйҙәр.

 Үткән тәүлектә вирус тағы ете ғүмерҙе алып киткән. Пандемия башланғандан алып афәтле сирҙән 5 502 яҡташыбыҙ донъя ҡуйған.

Республикала ковидҡа ҡаршы вакцинация әүҙем барыуын билдәләп китәбеҙ. Прививканың беренсе компонентын 2 516 187 (+2 564) кеше эшләткән, икенсеһен дә яһатыусылар – 2 389 639 (+3 387).