Нурия Абдуллинаға - 65

15 мартта Башҡортостандың атҡаҙанған мәҙәниәт хеҙмәткәре, күренекле композитор, автор – башҡарыусы Нурия Абдуллинаға 65 йәш тулды. Арҙаҡлы ҡатын- ҡыҙҙарыбыҙҙың береһе үҙенең ғүмер байрамын Төркиәлә ҡаршылай.

Нурия Абдуллина киң даирә тамашасыларға үҙенең популяр йыр- моңдары, “Юлдаш” йыр һәм мәғлүмәт каналының алып барыусыһы булараҡ  билдәле. Уның Фәрүәз Урманшин һәм Резида Әминева башҡаруындағы “Яңғыҙҙарҙы кемдәр яратыр” йыры хатҡа хитҡа әйләнгәйне. Нурия Нәсибулла ҡыҙы матур ижад юлы үтте, уның  тапшырыуҙарын әле лә радио тыңлаусылар һағына, ә йырҙарын  халыҡсанлығы, моңо өсөн әле лә  яратып тыңлайҙар.

Һуңғы йылдарҙа йырсыны яман сир шаңҡытты. Әммә Нурия Абдуллина тиҙ генә бирешә торған ҡатын- ҡыҙҙарҙан түгел. Ул һәр көнөн көрәшеп йәшәй, социаль селтәрҙәрҙә был хаҡта асыҡтан- асыҡ яҙа, үҙенең хәле, фекерҙәре менән бүлешеп бара.

• Мин яҙып барам, сөнки кешеләргә күпте аңлатҡым килә. Ауырыу бер кемдән дә һорап килмәй, ул көтмәгәндә шаңҡыта. Шуға һәр кем үҙенә, хәленә, һаулығына, ниндәйҙер билдәләргә иғтибарлы булһа ине - ти яратҡан йырсыбыҙ.

Нурия апай Абдуллина әле Төркиәлә. Быны ул сире арҡаһында климат үҙгәртеүгә бәйләне.

• Кешене тәҡдир, ризыҡ йөрөтә. Сит илгә беренсе тапҡыр сыҡтым һәм тәүгә ҡышлауға ҡалдым. Балалар менән кәңәшләштек тә шулай ҡарар ҡабул иттек. Максатым - һаулыҡты нығытыу. Әлегә  тормошҡа оптимистик ҡараштамын. Һәр атҡан таңға ҡыуанам, Хоҙай Тәғәләмә рәхмәт әйтәм! Йәшәгән еремдә Башҡортостандан да ҡәрҙәштәребеҙ бар, улар, рәхмәт яуғырҙары, ярҙамдан ташламай.

Нурия апай Абдуллинаны күркәм юбилей байрамы менән ҡотлайбыҙ. Уға иҫәнлек- һаулыҡтар теләп ҡалабыҙ!