Айҙар Ғәлимовҡа - 55

Эстраданың танылған йырсыһы, Башҡортостандың һәм Татарстандың халыҡ артисы Айҙар Ғәлимов Салауат Юлаев ордены менән бүләкләнде. Ватанды һаҡлаусылар көнөндә йырсыға 55 йәш тулды. Бүләк тапшырыу Айҙар Ғәлимов өсөн көтөлмәгәнсә булды.

 Айҙар Ғәлимов  Ватанды һалаусылар көнөнә арналған рәсми концертта сығыш яһаны. Уның һуңында алып барыусылар башҡарыусының тыуған көнө булыуын һәм уның Салауат Юлаев ордены менән наградланыуын билдәләне. Орденды Башҡортостан Башлығы Радий Хәбиров тапшырҙы.

• Мине Башҡортостан еренең патриоты тиҙәр. Был ысынлап та шулай. Һәр ваҡыт тыуған республикама хеҙмәт иттем. Ошонда йырсы булараҡ танылдым һәм әле лә эшемде, ижадымды Башҡортостанымда дауам итәм, - тине Айҙар Ғәлимов.

Салауат Юлаев ордены йырсыға оҙайлы ижади эшмәкәрлек, республика сәнғәтенә индергән өлөшө өсөн тапшырылды.