Ҡасаҡтарҙың бөтәһе лә ковидҡа тест үтәсәк

“Донбастан республикабыҙға килеүсе ҡасаҡтарҙың бөтәһенә лә шунда уҡ коронавирус инфекцияһына тест үткәреү мотлаҡ”, –  тип белдерҙе Башҡортостан Башлығы Радий Хәбиров Хөкүмәттең бөгөнгө оператив кәңәшмәһендә.

“Ундағы эпидемиологик хәлдең ниндәй икәнлеге беҙгә билдәһеҙ. Шуға күрә, иң беренсе сиратта уларға тест үткәреү мөһим”, – тип һыҙыҡ өҫтөнә алды Радий Хәбиров.

“Ҡасаҡтарҙы урынлаштырғанда эпидемиологик хәүеф тыумаһын өсөн, хәл контролгә алынды”, – тип хәбәр итте Роспотребнадзорҙың Башҡортостан буйынса идаралығы етәксеһе Анна Казак. Роспотребнадзор белгестәре муниципалитеттар башлыҡтары менән берлектә ваҡытлыса урынлаштырыу пункттарын ҡарайҙар. Донбастан килгән ҡасаҡтарҙың прививкалары булыу-булмауы етди тикшереләсәк.

“Йоғошло сирҙәр индереүгә һәм уларҙың таралыуына юл ҡуймауға аныҡ контроллек итеү өсөн, беҙҙең белгестәр тимер юл вокзалына ҡасаҡтарҙы ҡаршы алырға барасаҡ”, – тип өҫтәне Анна Казак.

Башҡортостанға Донбастан тәүге ҡасаҡтар иртәгә, 22 февралдә, килеп етәсәк. Улар ике меңгә яҡын булыр, тип көтөлә.