Яҡташтарыбыҙ Рәсәй командаһына көмөш һәм бронза миҙалдары алып килде

15 февралдә Пекинда үткән Ҡышҡы Олимпия уйындарында 9 миҙал комплекты уйнатылды.

Рәсәй спортсылары олимпия уйындарының 11-се ярыш көнөндә бер көмөш һәм бер бронза миҙалы яуланы.

Рәсәйҙең конькиҙа йүгереү спорты буйынса ир-егеттәр йыйылма командаһы (Даниил Алдошкин, Александр Румянцев, Сергей Трофимов, Руслан Захаров) эҙәрлекләү уҙышында көмөш призер булды.

Әйткәндәй, Руслан Захаров – Өфө егете.

Рәсәй биатлонсылары Карим Халили, Александр Логинов, Максим Цветков, Эдуард Латыпов ир-егеттәр эстафетаһында (4х7,5 саҡрым) өсөнсө урынға сыҡты. Яҡташыбыҙ Эдуард Латыпов, шулай итеп, Пекин Ҡышҡы Олимпиядаһында өсөнсө бронза миҙалы яуланы.

Рәсәй командаһы 20 олимпия миҙалы менән (4 - алтын, 7 - көмөш һәм 9 – бронза) дөйөм миҙалдар зачетында туғыҙынсы урынға төштө.

Лидер позицияһын  Норвегия тотоп килә (12 – алтын, 7 – көмөш, 7 бронза миҙалы). Унан ҡала Германия (9 – алтын, 6 – көмөш, 3 – баҡыр), АҠШ (7 – алтын, 6 – көмөш, 4 – баҡыр), Австрия (6 – алтын, 6 – көмөш, 4 – бронза), Нидерланды (6 – алтын, 4 - көмөш, 3 - бронза), Ҡытай (6 – алтын, 4 – көмөш, 2 – бронза), Швеция (5 – алтын, 3 – көмөш, 3 – бронза) һәм Швецария (5 – алтын, 5 – бронза) килә.

Дөйөм миҙалдар һаны буйынса 20 миҙал менән беҙ икенсе урында. Рәсәйҙән алда – Норвегия (26 миҙал).