Өфө ҡалаһы тағы йәмләнер

Башҡортостан Башлығы Радий Хәбиров Өфөнөң 450 йыллығын байрам итеүгә арналған сираттағы кәңәшмәһен үткәрҙе. Юбилей сараһы 2024 йылда уҙасаҡ. Кәңәшмәнең көн тәртибендә  баш ҡала парктарын, скверҙарҙы, йәмәғәт урындарын төҙөкләндереү,  иҫтәлекле датаға кәрәкле, мөһим объекттарҙы проектлау һәм төҙөү мәсьәләһе тикшерелде.

Кәңәшмәлә Республика Башлығының ҡала мөхите һәм йәмәғәт урындарын үҫтереү һорауҙары буйынса кәңәшсеһе Ольга Сарапулова билдәләүенсә, ҡала биләмәләре 2022 йылдарға төҙөкләндерелә башлаясаҡ.

• Өфөлә беҙ баш ҡала кешеләрен һәм ҡала ҡунаҡтарын йәлеп итерлек бер- нисә майҙансыҡ әҙерләүҙе күҙ уңында тотабыҙ. Был ниәттәр тормошҡа ашһа, ҡаланың йөҙө һиҙелерлек үҙгәрәсәк һәм ул Башҡортостандың визит карточкаһы буласаҡ, - тине ул.

Төҙөкләндереү эше Өфөнөң тарихи урындарында ғына түгел, ә байтаҡ биләмәләрҙә, шул иҫәптән Дим биҫтәһе, Орджоникидзе районының Нефтехимиктар паркы, Инорстағы “Теплое” күле буйында ла алып барыласаҡ.

Ҡайһы бер объекттарҙа эштәр аҙағына етеп килә. Мәҫәлән “Дан” бульварындағы сквер “Торлаҡ һәм ҡала мөхите” милли проектына ярашлы төҙөкләндерелә. Башҡа объекттарҙың төҙөлөшө Республика адреслы инвестиция программаһы, муниципаль бюджеттар һәм бюджеттан тыш сығанаҡтар иҫәбенә төҙөлә.

• Эштәрҙең масштабы бик ҙур. Иң мөһиме уны ҡала халҡы менән килешеп эшләргә кәрәк. Сөнки был скверҙар һәм парктарҙы беҙ тәү сиратта Өфө халҡы өсөн төҙөйбөҙ. Шуға күрә һәр бер ғаилә үҙенең йорто янында нимә төҙөлгәнен яҡшы белергә тейеш, - тине Радий Хәбиров.