Башҡортостан Башлығы яңы прокурор менән осрашты

Башҡортостан Башлығы Радий Хәбиров Башҡортостандың яңы прокуроры Игорь Пантюшин менән осрашты.

Билдәле булыуынса, Рәсәй Президенты үҙенең 2021 йылдың 8 декабрендәге Указы менән Игорь Пантюшинды Башҡортостан Республикаһы прокуроры итеп тәғәйенләгәйне.

– Һеҙҙе вазифаға тәғәйенләнеү менән ҡотларға рөхсәт итегеҙ. Республика прокуратураһы етәкләү – оло яуаплылыҡ. Башҡортостан – Рәсәйҙең ҙур һәм мөһим төбәге. Бында дүрт миллиондан ашыу кеше йәшәй. Иҡтисадыбыҙ ныҡлы, үҫеш тә ҡеүәтле беҙҙә, - тине Радий Хәбиров. - Башҡортостан – күп милләтле республика. Бында 150-нән ашыу милләт вәкиле дуҫлыҡта килешеп йәшәй. Прокуратураға килгәндә, ул - бик һөҙөмтәле орган. Беҙҙең эшебеҙ ҙә уртаҡ, сөнки халыҡ мәнфәғәттәре иң алда тора. 

– Игорь Станиславович – прокуратураның тәжрибәле, белемле, һөнәри яҡтан әҙерлекле етәксеһе. Уны шәхсән оҙаҡ йылдар беләм, бик әҙәпле кеше, тип ышаныслы әйтә алам. Һеҙгә Башҡортостанда уңыштар теләйем! – тине осрашыуҙа ҡатнашҡан Рәсәй Генераль прокуроры урынбаҫары Николай Шишкин.

Белешмә: Игорь Станиславович Пантюшин 1966 йылда Тамбов өлкәһендә тыуған. 1991 йылда Воронеж дәүләт университетын тамамлай, хеҙмәт юлын Липецк өлкәһенең Грязинский район-ара прокуратураһында башлай, 2003 – 2013 йылдарҙа Липецк өлкәһе прокуроры була, ә 2013 йылдан – Владимир өлкәһе прокуроры.