Башҡортостандан дүрт проект – еңеүсе!

Ульяновск ҡалаһында Х Russian Event Awards 2021 туризм өлкәһендә Милли премия финалы үтте. Башҡортостандан дүрт турист проекты еңеү яуланы. Жюри шулай уҡ Башҡортостан Республикаһы Башлығы Радий Хәбировтың туризмды үҫтереүгә ҙур өлөш индереүен билдәләне.

– Быйыл конкурста ҡатнашҡан бар төбәктәр араһында Башҡортостан финалистары иң күбен тәшкил итте. Тәҡдим ителгән 26 проекттың 18-е финалға сыҡты, – тип билдәләй БР туризм буйынса дәүләт комитеты рәйесе вазифаһын башҡарыусы Ринат Фәтҡуллин.

Бына ул, Russian Event Awards 2021 премияһы лауреаттары исемлеге:

– “Гастрономия туризмындағы иң шәп ваҡиға” номинацияһында “Бөрө билмәндәре” гастрономик фестивале – Гран-при, Бөрө ҡалаһы;

– “Йәштәр өсөн иң яҡшы туристик ваҡиға” номинацияһында Гран-при – “1000 музыкант көнө”, Өфө;

– “Тарихи йүнәлештәге иң яҡшы туристик ваҡиға” номинацияһында 1-се урын —“Ваҡыт йылғаһы” тарихи реконструкция фестивале, Бөрө;

 – “Спорт өлкәһендә иң яҡшы туристик ваҡиға” номинацияһында 2-се урын — “Малидак” ғаилә-спорт фестивале, Белорет.

Шулай уҡ сарала Ғилми-тикшеренеү үҙәге күргәҙмәһенең R&C махсус премияһы “1000 музыкант көнө”нә тапшырылды.

Фото – Башҡортостан Хөкүмәте сайтынан.