Тәүлек эсендә 20 яҡташыбыҙҙы юғалттыҡ

Һуңғы мәғлүмәттәр буйынса, республикабыҙҙа тәүлек эсендә коронавирус 344 сырхауҙа асыҡланған (кисә 333 ине), зәһәр инфекциянан 20 яҡташыбыҙ вафат булған (кисә – 18).

23 сентябргә ҡарата Башҡортостанда ковид йоҡтороусыларҙың дөйөм һаны 64 196 тәшкил итә. Дауаханаларҙа уға ҡаршы көрәшеүселәр – 672 (434-е – 60-ты уҙған), 51-енең хәле ауыр, 13-ө яһалма һулыш аппараты ярҙамында тын ала. Участка табибы күҙәтеүе аҫтында өйҙәрендә дауаланыусылар – 6 157.

Бер тәүлектә 184 кеше, яуыз сирҙе еңеп, дауахананан сыҡҡан. Сәләмәтләнеүселәр йәмғеһе – 55 890.

Шәфҡәтһеҙ вирус кисә 18 ауырыуҙың ғүмерен өҙһә, бөгөн 20 үлем осрағы теркәлгән. Шулай итеп, пандемия башланғандан алып коронавирустан вафат булыусылар 1 477-гә етте (1213-ө – 60 йәштән өлкәндәр).

Пневмонияға ҡағылышлы мәғлүмәттәр түбәндәгесә: кисәле-бөгөнлө был сир 178 сырхауҙа раҫланған, 168 кеше унан ҡотолоуға өлгәшкән.

Ковидҡа ҡаршы прививканың беренсе өлөшөн яһатыусылар – 1 259 935, шуларҙың 91,4 проценты, йәғни 1 152 704-е икенсеһен дә эшләткән.