Яңы антирекорд...

Республикабыҙҙа аҙаҡҡы 24 сәғәттә ковид инфекцияһынан 18 ғүмер өҙөлдө, ошоғаса бер тәүлек эсендә был тиклем һанда үлем осрағы теркәлгәне юҡ ине әле. Пандемия башланғандан алып зәһәр вирустан 1 457 яҡташыбыҙ вафат булған. Шуларҙың 1 195-е – 60 йәштән өлкәнерәк.

22 сентябрь мәғлүмәттәре буйынса, коронавирус йоҡтороусыларҙың дөйөм һаны 63 852-гә етте. Һуңғы тәүлектә 333 яңы ауырыу өҫтәлгән.

Бөгөнгө көндә 680 сырхау зәһәр сирҙән стационарҙа дауалана. Уларҙың күбеһе (442-һе) – 60 йәштән олораҡ. Ауыр хәлдәгеләр – 48, табиптар 15-ен яһалма һулыш аппаратына тоташтырырға мәжбүр булған. Амбулатор шарттарҙа дауаланыусылар – 6 009.

Үткән тәүлектә 307 кеше, яуыз инфекциянан ҡотолоп, дауахананан ҡайтҡан. Сирҙе еңеүгә өлгәшкән яҡташтарыбыҙ йәмғеһе – 55 706.

Дауахананан тыш пневмония менән ауырыусылар ҙа көн һайын күбәйә. Кисәле-бөгөнлө үпкә ялҡынһыныуы диагнозы 152 сирлегә ҡуйылған, унан сәләмәтләнеүселәр – 150.

Әлеге мәлдә республикала ковидҡа ҡаршы вакцинаның беренсе компонентын 1 257 059 кеше яһатҡан, икенсеһен дә эшләтеп, вакцинацияны тулыһынса тамамлаусылар – 1 148 029.

Фото "Башинформ"дан алынды.