Өфө - Ворлдскилс чемпионатын уҙғарыу урынына дәғүә итә

Башҡортостан Башлығы Радий Хәбиров  Ворлдскилс  милли чемпионатының финалын йыл һайын Башҡортостанда үткәреү тәҡдимен индерҙе. Өфө - тәү сиратта машиналар эшләү тармағының юғары үҫеше буйынса “WS баш ҡалаһы” тигән исемгә дәғүә итә ала, ти белгестәр.

Радий Фәрит  улының билдәләүенсә, Өфөлә ошондай кимәлдәге чемпионаттарҙы уҙғарыу өсөн нигеҙ бар.

- Баш ҡалала  сифатлы күнекмәләр өсөн етештереү майҙансыҡтары һәм тәжрибә уртаҡлашыу өсөн мөмкинлектәр бар.  ОДК-УМПО базаһында асылған Ростехтың яңы уҡытыу үҙәге бөтә тейешле ҡорамалдар менән тәьмин ителгән һәм ошо мәсьләләрҙе хәл итеүгә тулыһынса  тура килә, - тине республика етәксеһе.

Ростех дәүләт корпорацияһының хеҙмәт баҙарында талап ителгән эшселәр әҙерләүсе  уҡытыу- етештереү үҙәге 25 августа асылды. Ул ОДК- УМПО-ның етештереү майҙансыҡтарында урын алған. Унда әле Өфө машиналар эшләү колледжының уҡыу оҫтаханалары урынлшҡан.