Ямғырҙар икеләтә аҙыраҡ яуған

Быйылғы йәйҙә ямғырҙар уртаса айлыҡ норманан яҡынса ике тапҡырға аҙыраҡ булған.

Метеопрогноздар бүлеге етәксеһе Гөлназ Заһитова әйтеүенсә, Башҡортостанда ҡоролоҡ майҙа уҡ башланған. “Майҙа норманың өстән бер өлөшө, июндә – 60 проценты, июлдә – 70, августа 10 проценты ғына яуҙы”, – ти ул.

Өфөлә 1 августан бирле ямғыр күҙе төшкәне юҡ. Башҡортостанда һуңғы тапҡыр яуым-төшөм республиканың төньяҡ-көнбайышында, Яңауыл районында, булған.

“Алдағы өс көндә шундай уҡ һауа торошо һаҡланасаҡ. Көндәр август өсөн ғәҙәттән тыш эҫе торасаҡ”, – ти Гөлназ Заһитова.

Ныҡ эҫе булыу һәм тупраҡта дым бөтөнләй ҡалмау сәбәпле, Башҡортостанда игенселәр әле ужым культураларын сәсеүгә төшмәгән.

Фото "Башинформ"дан алынды.