Ауыр хәлдәгеләр йәнә артҡан

Башҡортостан һаулыҡ һаҡлау министрлығы коронавирус менән ауырыусылар араһында ауыр хәлдәгеләрҙең артыуын хәбәр итә. Дауаханала ятыусы 714 сырхауҙың 60-ы ауыр хәлдә, һигеҙе яһалма һулыш аппаратына тоташтырылған. Амбулатор шарттарҙа дауаланыусылар – 2 777, 997-һе – етмеште ҡыуыусы өләсәйҙәр һәм олатайҙар.

Бөгөнгө көндә ковид йоҡтороусыларҙың дөйөм һаны 51 444-кә еткән. Тәүлек эсендә вирус тағы ла 271 ауырыуҙы аяҡтан йыҡҡан.

Үткән тәүлектә афәтле сирҙән туғыҙ сырхау вафат булған. Унан донъя ҡуйыусылар, шулай итеп, 875 иҫәпләнә. Шуларҙың 703-ө – 60 йәште үткәндәр.

Аҙаҡҡы 24 сәғәттә 333 кеше, инфекциянан ҡотолоп, дауахананан сыҡҡан. Сәләмәтләнеүселәрҙең дөйөм һаны – 47 078.

Дауахананан тыш пневмония тураһында һүҙ алып барһаҡ, кисәле–бөгөнлө был сир 132 яҡташыбыҙҙа асыҡланған, 123-ө унан һауыҡҡан.

12 авгусҡа ҡарата ковидтан вакцинаның беренсе компонентын 1 028 849 кеше ҡаҙатҡан, икенсеһен дә яһатыусылар – 811 150.