Йәнә алты өйҙә ҡайғы...

27 июлгә ҡарата республикабыҙҙа коронавирус йоҡтороусыларҙың дөйөм һаны 47 221-гә еткән. Аҙаҡҡы тәүлектә ковид 260 яҡташыбыҙҙа асыҡланған.

Әлеге мәлдә стационарҙарҙа шәфҡәтһеҙ инфекциянан дауаланыусы 615 сырхау ята. 64-енең хәле ауыр, бишәүһе – яһалма һулыш аппаратында.

Сирҙе сағыштырмаса еңел кисереүсе 2 404 кеше өйөндә дауалана.

Һуңғы тәүлектә 327 ауырыу, хәтәр вирустан ҡотолоп, дауахананан сыҡҡан. Пандемия башланғандан алып һауығыусылар йәмғеһе – 43 462.

Ҡыҙғанысҡа ҡаршы, үткән тәүлектә ковид ҡорбандары тағы алтауға артҡан, хәҙер инде яуыз ауырыуҙан өҙөлгән ғүмерҙәр 740 булып китте.

Үпкә ялҡынһыныуы менән сирләүселәр тураһындағы мәғлүмәттәр түбәндәгесә: кисәле-бөгөнлө пневмония 134 кешене аяҡтан йыҡҡан, унан сәләмәтләнеүселәр – 120.

Республикабыҙға ковидҡа ҡаршы барлығы 1 049 988 доза вакцина килгән. Уның беренсе компонентын ҡаҙатыусылар – 883 418, икенсеһен яһатыусылар – 595 749.

Тәүлек эсендә 28 073 кеше прививка эшләткән (10 278-е – беренсе, 17 795-е икенсе компонентын).