Үткән тәүлектә вирус ҡайҙа күберәк асыҡланған?

Һаулыҡ һаҡлау министрлығы мәғлүмәттәре буйынса, аҙаҡҡы тәүлектә республикала коронавирус йоҡтороуҙың иң күп осрағы Өфөлә асыҡланған – баш ҡалабыҙҙа сир 44 ауырыуҙы аяҡтан йыҡҡан. Стәрлетамаҡта ул – 35, Салауатта – 21, Сибайҙа 15 сырхауҙа табылған. Ейәнсурала инфекция – 13, Баймаҡ һәм Ғафури райондарында 11-әр кешелә раҫланған. Республикабыҙҙа һуңғы 24 сәғәттә вирус эләктереүселәр 195-кә артҡан.

Пандемия башланғандан алып 9 июлгә тиклем ковид йоҡтороусыларҙың дөйөм һаны 42 936-ға еткән. Шуларҙың 40 190-ы һауыҡҡан, 183-ө уҙған тәүлектә дауахананан сыҡҡан.

Әлеге мәлдә зәһәр ауырыуҙан стационарҙа дауа алыусылар – 465. 39-ы ауыр хәлдә, алтауһы яһалма һулыш аппараты ярҙамында тын ала. Поликлиника табиптары күҙәтеүе аҫтында дауаланыусылар – 1 641.

Яуыз сирҙән вафат булыусылар тағы ла күбәйгән. Тәүлек эсендә биш яҡташыбыҙ донъя ҡуйған. Республикала коронавирус ҡорбандары хәҙер 640 иҫәпләнә.

Кисәле-бөгөнлө дауахананан тыш пневмония диагнозы 131 кешегә ҡуйылған, унан сәләмәтләнеүселәр – 115.