Йәнә алты ғүмер өҙөлгән

Башҡортостан һаулыҡ һаҡлау министрлығы мәғлүмәттәре буйынса, аҙаҡҡы тәүлектә коронавирус 193 ауырыуҙа раҫланған. Республикала 7 июлгә ҡарата ковид йоҡтороусылар йәмғеһе 42 545 иҫәпләнә.

Бөгөнгө көндә стационарҙа 471 сырхау шәфҡәтһеҙ сиргә ҡаршы алыша. 38-е ауыр хәлдә, бишәүһе – яһалма һулыш аппаратында. Участка табибы тәғәйенләгән дауаларҙы алып, өйҙәрендә дауаланыусылар – 1 758.

Һуңғы 24 сәғәттә коронавирустан һауыҡҡан 234 кеше дауахананан сығарылған. Яһил инфекцияны еңеүселәрҙең дөйөм һаны – 39 687.

Үткән тәүлектә афәт йәнә алты ғүмерҙе өҙгән. Республикала ковид ҡорбандары 629-ға етте.

Кисәле-бөгөнлө дауахананан тыш пневмония диагнозы 130 ауырыуға ҡуйылған, үпкә ялҡынһыныуынан сәләмәтләнеп, стационарҙан ҡайтыусылар – 115.