Бала имеҙеүсе әсә ковидтан прививка яһатҡан

Гватемалала һәм Никарагуала ярлылар өсөн клиникалар төҙөгән Өфө табибы, өс бала әсәһе Виктория Валикова коронавирустан прививка яһатҡан.

Виктория йөклөлөктөң аҙаҡҡы аҙнаһында коронавирус менән сирләгән икән. Бәпесен табып, өс ай үткәс, оҙаҡҡа һуҙмайынса, вакцина эшләтергә булған.

«Өс балам бар, ауырып китһәм, бөтәһенә лә бик ауырға тура киләсәк. Ирем Эндрю (ул Америка кешеһе) виза мәсьәләһен хәл итеү өсөн АҠШ-ҡа киткәйне. Ҡасан ҡайтыры әлегә билдәһеҙ», – ти Виктория.

Ул вакцинацияны һәйбәт үткәреүен, бер тәүлек тирәһе аҙыраҡ хәлһеҙлек тойоуын билдәләй, тип яҙа “Башинформ” мәғлүмәт агентлығы.

Әлеге мәлдә Өфөлә һәм Стәрлетамаҡта туғыҙ күсмә вакцинациялау пункты эшләй. Һигеҙе Өфөлә: «Простор», «Акварин», «Мир», «Мега», «Планета» сауҙа үҙәктәрендә, «Үҙәк» сауҙа комплексында, «Ҡунаҡһарай» сауҙа-эш комплексында, «Башҡортостан» Лайфстайл-үҙәгендә һәм береһе Стәрлетамаҡта  «СитиМолл» сауҙа үҙәгендә урынлашҡан.

Улар эш көндәрендә иртәнге сәғәт 11-ҙән киске сәғәт һигеҙгә тиклем, ял көндәрендә (байрамдарҙы ла индереп) иртәнге 10-дан киске һигеҙгә ҡәҙәр асыҡ.

Фото социаль селтәрҙән.