Иран көндәлеге: 30 ноябрь 2019 йыл

Исфахандан 20 миллион кеше йәшәгән Ирандың баш ҡалаһы Тегеранға кире автобуста алты сәғәттән ашыу килдек. Биш йондоҙло "Эспинас" ҡунаҡханаһана урынлашҡас, Тегерандың тағы бер гүзәллеге "Табиат" ("тәбиғәт" тип тәржемә ителә) күперен барып күрергә тәҡдим иттеләр. Күпергә таш баҫҡыстар буйлап парк аша төштөк тә, хайран ҡалдыҡ. Алда мең уттарҙа яҡтырып бормаланып дүрт ҡатлы күпер ята ине. Йәйәүлеләр өсөн тәғәйен ҡоролма баҫҡанда бәүелгән һымаҡ. Ә аҫта – һыу түгел, автомобилдәр ағымы. "Һыу һәм ут" һәм «Джангале Талегани» парктарын тоташтырған 270 метр оҙонлоғондағы күпер 2014 йылдың 13 октябрендә асыла. Ул өс ҡаттан тора, тинеләр. Өҫтән шыуып төшөп кенә китмәле һуҡмаҡтар аҫҡы ҡаттарға илтә торғандыр, тип ҡараныҡ. Тик ҡатын-ҡыҙ ҡулы ошондай матурлыҡты тыуҙыра ала торғандыр! Архитектор Ләйлә Арагиан уны 28 йәшендә төҙөй башлаған. 5 йыл буйына барған төҙөлөш уңышлы тамамланған. 2015 йылда Нью-Йоркта үткән ҡала архитектураһы конкурсында донъяның иң бөйөк 300 иң бөйөк ҡоролмалары араһында бишенсе урынға лайыҡ тип табылған. Шуға ла иранлылар был күпер менән, уны төҙөй башлағанда тик 28 йәшен тултырған Ләйлә Арагиан менән сикһеҙ ғорурлана.