Бөгөн уларҙың икеһен дә Иҫке Бәпес ауылы биләмәһе халҡының төп терәге һәм таянысы, тиергә лә була. Ҡуралағы мал – ауыл кешеһенең күҙ төбәп торған ҡәҙерле мөлкәте. Мал да, тейешле ҡарау етмәһә, ваҡытында анализ алынып, прививка яһатылмаһа, сиргә бирешеүсән. Шуға Абдуллиндарға үҙ машиналарында унлаған ауылды айына бер нисә ҡат урарға тура килә.
Һөнәрҙәренә тоғро ғаиләнең көткән донъяһы ла күптәргә өлгө булырлыҡ. Улар, ҡура тултырып, мал, ҡош-ҡорт тота, гөрләтеп баҡса үҫтерә, бал ҡорто үрсетә. Ҡыҙҙары Гөлфиә менән Гөлназ, улдары Хәйҙәр ата-әсәһенә хужалыҡта ярҙам итә. Былтыр Абдуллиндар, ике ҡыҙын да кейәүгә биреп, оло туй мәжлесе ойошторған.
Егәрле ҡатындың тағы бер яратҡан шөғөлө – сәскә үҫтереү. Йәйен уларҙың йорт тирәһе аллы-гөллө шау сәскәгә күмелә.
“Ҡасан килмә, Фидариә килендең өҫтәле ризыҡ менән тулы, ихатаһы, өйө таҙалыҡ һәм тәртип менән балҡып тора. Мөләйем хужабикәнең табынында һәр ваҡыт башҡорт балы, ҡаҙылыҡ, үҙе әҙерләгән һөт ризыҡтары, ҡайнатмалар, туҡмаслы йылҡы йәки тауыҡ-ҡаҙ итенән һурпа, иттән, емеш-еләктән бәлештәр, торттар… Бөтәһенә лә нисек өлгөрә икән, тип ғәжәпләнеп тә ҡуям. Уңған килен – донъя күрке”, – ти ауыл хакимиәте биләмәһе рәйесе Нурия Хәсән ҡыҙы Абдуллина.
“Башҡортостан ҡыҙы” журналына Фидариә ханым үҙе яратып әҙерләгән аштарҙы тәҡдим итте. Ғаиләлә улар холестеринһыҙ йылҡы итенә өҫтөнлөк бирә һәм, майлы аҙыҡ ашағанда ҡорот, йәшел тәмләткестәр һалынған ҡатыҡ, үҙҙәре үҫтергән йәшелсәләр ҡуллана икән. Сәләмәт тормош һағында торған ғаиләнең бәхете лә бөтөн, уй-ниәттәре лә изге.
Баллы торт
Талап ителә: 0,5 кг он, 2 йомортҡа, 250 г маргарин, 2 ҡалаҡ бал, бер стакан шәкәр, ярты балғалаҡ аш содаһы, бер һауыт ҡуйыртылған һөт.
Онға туғылған йомортҡаны бал, шәкәр, маргарин менән ҡушып баҫабыҙ. Әҙер ҡамырҙы 6-7 сантиметр ҡалынлыҡта түңәрәкләп йәйеп, 180 градусҡа тиклем эҫетелгән мейескә ҡуябыҙ. 20–25 минуттан ул бешеп тә сыға. Өҫтөнә ҡуйыртылған һөт яғабыҙ (ҡуйыртылған һөттө һауыты менән һыуҙа ҡайнатырға йәки әҙер ҡайнатылғанды һатып алырға). Шулай уҡ өҫтөн ыуылған печенье вағы, йөҙөм, өрөк йәки сәтләүек онтағы менән биҙәргә мөмкин.
Йәшел тәмләткестәр менән ҡатык
1,5–2 литр ҡатыҡ, берәр ус һуған ҡыяғы, йәшел әнис, шәфәри алына.
Ойотолған ҡатыҡҡа ваҡлап туралған йәшел тәмләткестәр өҫтәп, яҡшылап болғатҡас, шешәгә тултырып, туңдырырға ҡуябыҙ. Һуңынан иретеп, ашҡа һалыр өсөн ҡулланабыҙ.
Ҡаҙылыҡ
Йылҡының эс майы менән ите (ҡаҙылығы), ас эсәге, самалап тоҙ, борос, һарымһаҡ алына.
Эс майы менән итен айырып алғас, тоҙлап, борослап, ваҡ ҡырғыс аша үткәрелгән һарымһаҡ ҡушып, яҡшылап йыуылған эсәккә тултырырға. Туңдырғысҡа һалып ҡуйырға. Бешерер алдынан ҡаҙылыҡты иретергә, бүҫелмәһен өсөн энә менән бер нисә урындан тишкеләп алырға кәрәк.