Һыуһындарҙы баҫыр лимонад

Ер еләге менән
400 грамм ер еләге, 3 лимон, 2 литр һыу, 12 ҡалаҡ шәкәр кәрәк.
Лимондың һутын һығабыҙ. Еләкте иләк аша үткәрәбеҙ. Һыу ҡоябыҙ, шәкәр һалабыҙ ҙа ирегәнсе болғатабыҙ.

Иң еңел ысул
2 лимон, 200 грамм шәкәр, 750 миллилитр һалҡын һыу алына.
Лимондың һутын һығабыҙ ҙа шәкәр һалабыҙ, һыу ҡоябыҙ һәм яҡшылап болғатабыҙ.
Былай артыҡ шәкәрле һәм ҡуйы кеүек тойолһа, икенсе ысул буйынса эшләп ҡарарға мөмкин.
1 лимонға 2 литр һыу, 1 стакан шәкәр һалабыҙ. Лимондың ҡабығын да ваҡлап һалабыҙ. Ярты сәғәттәй ултыртып торабыҙ. Һөҙәбеҙ.

Ирәүәнле лимонад
8 ирәүән һабағына 8 стакан һыу, 1/3 стакан шәкәр, тәменсә бөтнөк үләне, боҙ алабыҙ.
Ирәүән һабаҡтарын шаҡмаҡлап турайбыҙ ҙа, һыу ҡойоп, 1 сәғәт ҡайнатабыҙ. Шәкәр өҫтәйбеҙ, һәйбәтләп болғатабыҙ һәм һөҙәбеҙ. Һыуынғас, боҙ киҫәктәре, бөтнөк япраҡтары һалып тәҡдим итәбеҙ.

Тархун
Ярты ус эстрагон үләненә 1 литр һыу, 1 лимон, 2 ҡалаҡ бал алабыҙ, тәменсә еләктәр ҡушырға була.
Лимондың орлоҡтарын алып ташлайбыҙ. Эстрагон япрағы ҡушып, блендерҙа иҙәбеҙ. Башҡа ингредиенттарҙы өҫтәп, яҡшылап болғатабыҙ.

Мәҡәләнең тулы вариантын журналдың 6-сы (2023) һанында уҡығыҙ.