Һытҡынан ҡотолоп була

«Үҫмер сағымды ғүмеремдең иң бәхетһеҙ осоро тип һанайым. 8-се класта маңлайыма сыҡҡан биш-алты бөртөк һытҡы туғыҙынсыла бөтә битемде ҡапланы, бер йылдан арҡамды, беләктәремде баҫты. Маңлайҙағы эренле шештәрҙе йәшерер өсөн сәсемде күҙемә хәтлем төшөрөп йөрөй башланым. Үҙемде ныҡ йәмһеҙ һәм кәм тойоп, ҡабырсаҡҡа бикләндем. Киң ғәләм тарайҙы, аҙ һүҙлегә әйләндем, уҡыуҙан башҡа бер нәмәне лә белмәнем. Был минең өсөн оло фажиғә ине. Әсәйем табиптарға, имсе әбейҙәргә йөрөттө. Бер дауа ла, хатта ҡан таҙартыу ҙа ярҙам итмәне. Егерме йәштә һытҡылар юҡҡа сыҡты, әммә йәмһеҙ эҙҙәр ҡалды», – тип һөйләгәйне бер ханым. Битендәге шаҙралар уға матур ғаилә ҡорорға, һөнәрендә уңыш ҡаҙанырға ҡамасауламай, ләкин үҫмер ваҡытында донъялағы иң бәхетһеҙ ҡыҙ булыуын йыш иҫкә төшөрә. Билдәле дерматолог, республика тире-венерология диспансеры табибы Алһыу ХАММАТОВА, был тарихты ишеткәс: «Эйе, тәү ҡарашҡа проблема кеүек күренмәгән биттәге һытҡы кешенең кәйефенә, тотошона ғына түгел, хатта яҙмышына йоғонто яһаған, улай ғына ла түгел, бәхетенән яҙҙырған хәлдәр ҙә бар. Шөкөр, бөгөнгө медицина был сирҙең иң ауыр осрағын да дауаларға өйрәнде», – тине. Алһыу Әнүәр ҡыҙы һытҡы баҫыуҙың сәбәптәре, унан нисек ҡотолоу хаҡында бәйән итә.