“Күк һаҡал” таратҡан сир

Тәүге ҡатыны ҡаты ауырып вафат булғас, ул икенсегә өйләнә. Күпмелер ваҡыттан һуң был һылыу ҙа сирләп донъя ҡуя. Типһә тимер өҙөрлөк йәштәге уҙаман өсөнсөгә кәләш ала. Ошоғаса сирҙең ни икәнен белмәгән ҡатын күҙ алдында һулый башлай. Дауаланыуҙың файҙаһы теймәйенсә, бисара йән бирә. Ни ғәләмәт? Ҡатындарҙың өсөһө лә бер ауырыуҙан – аналыҡ муйынтығы яман шешенән вафат булыуын абайлап, табиптар ирҙең үҙенә тикшерелергә ҡушһалар, унда папиллома вирусының ошо сирҙе тыуҙырыусы төрө асыҡлана. Ҡасандыр уға осраҡлы бәйләнештән күскән вирус, шулай итеп, өс ҡатынының ғүмерен өҙә. Был тарихты миңә даими авторыбыҙ – юғары категориялы гинеколог Рәүфә Йәнтилина сираттағы мәҡәләне әҙерләгән саҡта һөйләгәйне.

Яман шеш йоҡмай, тибеҙ, ләкин уны булдырыусы йоғошло вирустар барлығын беләһегеҙме икән? Кеше папилломаһы вирустары – енси юлдарҙағы инфекцияны тыуҙырыусы вирустар. Вирустың йөҙҙән ашыу төрө бар. Күбеһе һаулыҡ өсөн ҙур ҡурҡыныс тыуҙырмай, дауаламайынса ла бер нисә айҙан юҡҡа сыға. Ләкин кәмендә ун дүрт төрө яман шеш тыуҙырыусыларҙан һанала. Рәүфә Йәнтилинаның “Яман шеште ниндәй вирус тыуҙыра?” тигән мәҡәләһе (https://bashkortostankyzy.rbsmi.ru/articles/kho-ay-a-lar-a-lan-andy/yaman-sheshte-nind-y-virus-tyu-yra/) үҙ һаулығығыҙға иғтибарлы булырға саҡырыр.