Иң өлгөр еләк

Иң тәүҙә үк шуны әйтеп үтергә кәрәк: беҙҙең урмандарҙа үҫкән ҡыҙыл, ҡыҙғылт һары, һары еләкле айыу баланын ашарға ярамай – улар ағыулы. Ашай торған төрөнөң емештәре оҙонса, ҡарағусҡыл күк, төҫө менән көртмәлене хәтерләтә.
Шәкәр менән бутап ашаһаң, әсеһе кәмей, телде йоторлоҡ була. Унан джем, желе, кеҫәл, туңдырма әҙерләйҙәр, бәлеш эслеге итеп тә файҙаланалар. Турамаға ҡушҡанда ул йомшаҡ сыр, йәшел тәмләткес үләндәр менән килешә. Ҡышҡылыҡҡа шәкәргә бутап, киптереп, туңдырып һаҡларға була.
Ҡыуаҡ артыҡ ҙур түгел, оҙонлоғо – 1,5 метр самаһы. 15 – 17 йыл бер урында үҫә ала. Ҡышҡы сасҡау һыуыҡтарҙы ла еңел үткәрә, ә сәскәләре 7 градус һалҡынға ла бирешмәй. Айыу баланы үҙ аллы үрсей алмай, шуға ла юғары уңыш алыу өсөн 2-3 сортты бергә ултыртырға кәрәк.