Хуш еҫтәрен бөркәләр

Был гүзәл сәскә, баҡһаң, картуф, борос, томаттарҙың «туғаны» икән – ул эт ҡарағаты һымағыраҡтар (пасленовые) ғаиләһенә инә. Тыуған яғы – Көньяҡ Америка илдәрендә күп йылдар үҫкән петунияларҙың оҙонлоғо 10-ар метрға етеүе бар. Европала ул йортто, урамды биҙәү өсөн иң киң ҡулланылған культура һанала. Беҙҙә иһә бер йыллыҡ үҫемлек булараҡ үҫтерелә.

Аҫылмалы, «шарлауыҡ» төрҙәре кашполарҙа, йәшниктәрҙә, балкондарҙа үҫтереүгә ҡулай. Ә ғәҙәти клумбаға ултыртһаң, улар ерҙе ҡаплап, сәскәле балаҫ булып түшәлә. Ҡыуаҡлы төрҙәре иһә оҙон булып үҫмәй, күпереп торған, гөлдәргә күмелгән бәләкәс кенә ҡыуаҡты хасил итә. Ҡатмарлы таж япраҡлы (махровая), күп сәскәле, суҡлы (бахромчатый) төрҙәре – иң эре сәскәле, раузаны хәтерләткән ҡупшыҡайҙар.

Вегетация осоро оҙаҡҡа һуҙыла. Шуға ла беҙҙә уны үрсетмә аша, борос, баклажан менән бергә февраль аҙағында – март башында сәсәләр. Петуния үҫтереүҙең иң яуаплы осоро – тап ошо мәлдә.

Иң рәхәте – әҙер тупраҡты кибеттән һатып алыу, әлбиттә. Тәжрибәле баҡсасылар шулай итергә кәңәш итә. Бындай мөмкинлек һис булмаһа инде баҡса тупрағына торф, йылға ҡомо ҡушалар, барыһын да бер үк нисбәттә алалар. Шунан уға дезинфекция үткәреү өсөн ярты сәғәт дауамында мейес эҫеһендә йә быуҙа тоталар. Артабан алһыу ғына марганцовка иретмәһе йә фитоспорин һибеү бактерия һәм кәрәкмәгән микроорганизмдарҙы бөтөрөр. Петуния өсөн 4,5 сантиметр диаметрлы торф таблеткаларын да ҡулланырға мөмкин. Үрсетмәләр өсөн һауыттарҙың 8 – 10 сантиметр киңлектәгеһе йәтеш.

Был сәскәнең орлоҡтары бик ваҡ, шуға ла тупраҡ өҫтөнә уларҙы тигеҙ генә итеп урынлаштырыу еңел түгел. Башлыса өс төрлө ысул ҡулланыла.