-22 °С
Болотло
Антитеррор
Бөтә яңылыҡтар
Рухиәттә – ваҡиға
29 Октябрь 2021, 17:05

Башҡорт мәҙәниәте һәм тарихы фестивале сиктәрендә

Бөтә донъя башҡорттары ҡоролтайы иғлан иткән Башҡорт тарихы йылы сиктәрендә башҡорт телен, мәҙәниәтен популярлашытырыу һәм башҡорт халҡы тарихын өйрәнеү маҡсатында ағымдағы йылдың октябрь-ноябрь айҙарында республикала Башҡорт мәҙәниәте һәм тарихы фестивале үтә.

Башҡорт мәҙәниәте һәм тарихы фестивале сиктәрендә
Башҡорт мәҙәниәте һәм тарихы фестивале сиктәрендә

Саралар сағыу концерт программаларын һәм башҡорт теленең мәҙәниәте, тарихы буйынса белем биреү-мәғариф проекттарын берләштерә.
Ижади хәрәкәт Стәрлетамаҡ дәүләт театр-концерт берләшмәһенең һәм Нефтекама дәүләт филармонияһының профессиональ артистарының республика ҡалалары һәм райондары буйлап ойошторолған гастролдәренән тора. Унан тыш урындарҙа ла был сараға әүҙем әҙерләнәләр, башҡорт халҡының көнкүрешенә, тарихына бәйле тематик күргәҙмәләр, стендтар әҙерләйҙәр.
Стәрлетамаҡ дәүләт театр- концерт берләшмәһе директоры урынбаҫары Радик Ғиззәтов фестиваль сиктәрендә тамашасылар өсөн бай концерт программаһы әҙерләнек, тип белдерә. Кисә сәтрлетамаҡтар Бәләбәй тамашасылары алдында сығыш яһаған.
– Программала филармония, бейеү театры артистары ҡатнаша. Бер-нисә районда сығыш яһаныҡ. Тамашасылар рухланып, илһамланып ҡалдыҡ, тип рәхмәт һүҙҙәрен еткерә. Беҙҙең бейеү ансамбле бик популяр, улар ҡуйған башҡорт бейеүҙәре береһен дә битараф ҡалдырмай. Артабан беҙ Миәкә, Бишбүләк, Балговар һәм Йәрмәкәй райондарында сығыш яһаясаҡбыҙ, – ти етәксе урынбаҫары.
Башҡорт мәҙәниәте һәм тарихы фестивале үҫеп килгән быуынды тәрбиәләүҙә лә мөһим роль уйнай, тарихҡа һәм мәҙәниәткә ҡарата ҡыҙыҡһыныу барлыҡҡа килә, быуындар күсәгилешлеге һаҡлана.
Тамашасылар араһында Бәләбәй башҡорт гимназияһы директоры Дилбәр Фатхетдинова ла бар.
– Быйыл Бөтә донъя башҡорттары ҡоролтайы тарафынан Башҡорт тарихы йылы иғлан ителде. Уның сиктәрендә районда, беҙҙең башҡорт гимназияһында бик күп эштәр атҡарылды. Әйткәндәй, уҙған аҙнала ғына беҙ Кесе балалар ҡоролтайын үткәрҙек. Сараға районыбыҙҙың бөтә башҡорт теле уҡтыусылары килде, мәртәбә өҫтәп, район хакимиәте башлығы Азат Сәхәбиев тә ҡатнашты. Беҙҙең гимназияла яҡын тирәләге ун райондан 800-ҙән ашыу бала белем ала. Бәләбәй районы һәм ҡалаһынан тыш, Бишбүләк, Миәкә, Әлшәй, Туймазы, Йәрмәкәй, Бүздәк, Дәүләкән, Шишмә райондары балаларына белем бирәбеҙ. Татарстан Республикаһының Әлмәт ҡалаһынан да килеп уҡыусылар бар. Ҡоролтай бөтәһенә лә бик оҡшаны. Ә инде бәләкәй күңелдәргә беҙ һалған рухи тәрбиә ошондай ҙур тамашаларҙа нығына. Беҙ үҙебеҙгә алмашҡа илһөйәр, телһөйәр, мәҙәниәтебеҙ, тарихыбыҙға ихтирамлы балалар тәрбиәләйбеҙ.
Әйткәндәй, концерттар барлыҡ эпидемиологик талаптарға ярашлы ойошторола.

Автор:
Читайте нас в