Кәкүк

Кәкүк йылы яҡтарҙан ағастар япраҡ ярғансы ҡайтһа, ағастың иң башында ултырып йә беренсе тапҡыр күк күкрәгәнсе саҡырһа, йыл ауыр киләсәк, ҡоролоҡ йә башҡа сәбәп менән яҡшы уңыш булмаҫ. Ә түбәнерәк ботаҡҡа ҡунған икән – ураҡ мул булыр.

Тәүге тапҡыр саҡырыуын ишеткәндә аҡса шылтыратһаң, һис юғында, кеҫәңде ҡапшаһаң – байлыҡ артасаҡ. Ғөмүмән, беренсегә ишетеүсегә ырыҫ киләсәгенә күп халыҡтар ышана. Тауыштың уң ҡолаҡҡа салыныуы айырыуса хәйерле тип иҫәпләнгән. Башҡорттарҙа” Кәкүк айы” айы тигән төшөнсә булған – йәйләүгә сығыу мәле, ҡоштоң ҡысҡыра башлауы менән тап килгән. Киләсәккә пландар ҡороу өсөн хәйерле ваҡыт тип иҫәпләнгән. Ә бына ауылға, йортҡа кәкүк осоп килеүҙе насарға юрағандар( аслыҡ, янғын, кеше үлеү), хәүефтән ҡотолоу әмәле – ҡошто кирбес киҫәге йә ут ҡағылған башҡа таш менән ҡыуыу. Тап ошондай ҡурҡыуға “Кәкүк сәйе” йолаһы ла нигеҙләнә. Матур итеп кейенеп сәхрә сыҡҡан ҡатын-ҡыҙ һәм бала-саға үҙҙәре күңел асыуҙан тыш, кәкүк ҡунған ағас төбөнә аҡ ризыҡ (һөт, ҡатыҡ) ҡойор булғандар.