Изгелек нурҙары өләшә

Суфия Нуриәхмәт ҡыҙы Рәхимова (Дауытова) Ишембай районы Байғужа ауылында тыуып үҫә. Салауат педагогия училищеһын, Кинйәбулат ауылында бер йыл эшләгәндән һуң, Стәрлетамаҡ дәүләт педагогия институтын ҡыҙыл дипломға тамамлай. Ауырғазы районының Төрөмбәт урта мәктәбендә уҡытыу буйынса директор урынбаҫары булып эшләп бер йыл тәжрибә туплағандан һуң, Кинйәбулатҡа балалар уҡытырға ҡайта. Башҡорт мәктәптәре өсөн рус теле дәреслектәрен яҙыуҙа ҡатнаша. Кейәүгә сыҡҡас, Салауат ҡалаһында һөнәри-техник белем биреү өлкәһендә уҡыта. Тормош юлдашы Венерҙы эше буйынса Сорғот ҡалаһына ебәрәләр, Суфия ла уның артынан эйәрә. Ул яңы урында ла уҡытыусы булып оҙаҡ йылдар хеҙмәт итеп, хаҡлы ялға сыға. Гимназияла эшләгәнендә йөҙәрләгән методик әсбап яҙа, улар төрлө баҫмаларҙа донъя күрә.

Матур ғаиләлә ике бала үҫә. Илдар улы, үкенескә күрә, фажиғәле рәүештә һәләк була. Гөлнара ҡыҙы әлеге ваҡытта Сорғот ҡалаһында математика уҡытыусыһы булып эшләй. Суфия ханымдың тормош иптәше 10 йыл элек вафат була.

Суфия Нуриәхмәт ҡыҙы ҡул эштәре менән Сорғоттан ҡайтҡас шөғөлләнә башлай. «25 йылдан артыҡ Башҡортостандан ситтә йәшәгәс, үҙ илемдең тарихын, халҡымдың ғөрөф-ғәҙәттәрен, йолаларын яңынан өйрәнергә тура килде», – ти Суфия апай. 2019 йылда Ишембайҙа Һабантуй бәйгеһендә ҡатнашып, «Иң яҡшы ихата хужабикәһе» исеменә лайыҡ була. 2020 йылда Байғужа ауыл советында яҡташтары уға арнап, «Ил тарихында – мәктәп тарихы, мәктәп тарихында – уҡытыусы яҙмышы» тигән осрашыу үткәрә. Кисәнең икенсе бүлегендә Суфия Нуриәхмәт ҡыҙы үҙенең ҡул эштәре күргәҙмәһе менән таныштыра. Хаҡлы ялдағы ирекмән булараҡ, ул төрлө акцияларҙа ҡатнаша, үҙе эшләгән биҙәүестәрҙе тыл һәм хеҙмәт ветерандарына, юбилярҙарға бүләк итә.

Йомарт, ихлас, сыуаҡ күңелле, һомғол буйлы апайҙан йылы ипкен килә. Изгелек нурҙары өләшеп, тормошобоҙҙо йәмләп йәшәй ул.

Автор:

Читайте нас:

Новости партнеров

Синоптиктарға ышанырғамы, Рәйес бабайғамы?

“Җиде бала үстек әткәй белән...”

О чём говорят немые колонны Уфы