«Аһ!» иттерер гүзәллек

Ул тыуҙырған матурлыҡты күргәс, «аһ!» итмәү мөмкин түгел. Кем һуң ул шундай оҫта ханым, тип һорарһығыҙ. Илүзә Нуретдин ҡыҙы Байегетова 1978 йылдың 12 ғинуарында Бөрйән районының Ғәҙелгәрәй ауылында тыуып үҫкән. Әлеге көндә Стәрлетамаҡ ҡалаһында йәшәй.

Стәрлетамаҡ һөт заводында хеҙмәт итә. Кейәүҙә, тормош иптәше менән бер ул тәрбиәләп үҫтергәндәр. «Бисерҙан сәскәләр эшләү менән 6 йыл элек мауығып киттем.Тәүҙә ябай ғына миләүшә, рауза сәскәләре яһап ҡараным, килеп сыҡҡас, ҡатмарлыраҡтарына күстем. Һуңынан биҙәүестәр ижад итеү ылыҡтырҙы. Был шөғөлгә интернеттан бисер маһирҙарының оҫталыҡ дәрестәрен ҡарап өйрәндем», – ти ул. Сәйләндән матурлыҡ тыуҙырыу – Илүзә өсөн килем сығанағы түгел, күңел көҫәгән шөғөл генә. «Эшләнгәндәре йыйылып китһә, һатам, эштә, интернетта таныштарға тәҡдим итәм, улар таныштарына ебәрә. Ҡул эше түҙемле, тыныс булырға өйрәтә. Киләсәктә хыялым – үҙемдең генә ижад емештәремдән торған күргәҙмә ойоштороу», – ти оҫтабикә.

Читайте нас: