Һыйлы йыл килә!

Яңы 2021 йылды күптәребеҙ өйҙә ҡаршылар, моғайын. Интернет «белгестәр»е байрамды бөгөнгө шарттарҙа «пижама кисәһе» итеп ойошторорға кәңәш бирә. Шуға ла йортто биҙәүгә иғтибарҙы, ваҡытты йәлләмәйек, кәйефтәребеҙ күтәренке булһын.

Шыршыны йыл һайын ҡулланған уйынсыҡтар менән биҙәү мотлаҡ түгел. Быйыл, бәлки, балалар менән үҙенсәлекле яңы биҙәүестәр эшләргәлер? «Һандыҡтарығыҙҙы» соҡоп ҡарағыҙ әле. Унда үҙегеҙ бәләкәй саҡта шыршы биҙәге булған әйберҙәр ятмаймы?

Ихатаны ла иҫ киткес итергә мөмкин. Ағастан, боҙҙан һындар эшләп ҡуйыу өсөн байтаҡ тырышлыҡ кәрәк, ә бына боҙ шарҙар элеп сығыуҙың һис ауырлығы юҡ. Уларҙы төрлө төҫкә буярға ла мөмкин, эсендә миләш, балан кеүек емештәрҙе, шыршы энәләрен йә булмаһа төрлө төҫтәге тәтәйҙәрҙе ҡалдырып туңдырһағыҙ, бик күңелле килеп сыға. Әллә ҡасандан тотонолмаған ағас сана ла бик килешле мөхит тыуҙырырға ярҙам итер.

Телевизорға текәлеп кенә ултырмайыҡ, үҙебеҙҙең күңелде үҙебеҙ күрәйек. Тышҡа сығып ҡар бәрешәйек, епшек ҡарҙан Ҡар бабай әүәләйек. Ә һеҙ ҡарҙан шәмдәл яһап, эсенә фонарь ҡуйып ҡарағанығыҙ бармы?

Бер-берегеҙҙән «интервью» алып, киләһе йылға теләктәрен, ниәттәрен яҙҙырып, кино ла төшөрөргә мөмкин.

Мандаринды кем тиҙерәк әрсеп ашап бөтөр? Ун икегә тиклем һанағансы кем күберәк Яңы йыл тураһында һүрәт төшөрөп өлгөрөр? Ябай ғына ярыштар ялҡытмай ҙа, күңелле лә була. Бына тағы ла бер нисә уйын. Уларҙы Яңы йыл төнөндә лә, оҙайлы ялда ла уйнарға мөмкин.

«Эҙәрмән». Шыршы төбөндә Ҡыш бабай (Ҡарһылыу, Ҡар батшабикәһе, Мәскәй әбей...) хат ҡалдырған. Аһ, ул бүләктәрҙе йәшергән дә баһа! Табыр өсөн төрлө мәсьәләләрҙе сисергә, бирелгән эштәрҙе башҡарырға кәрәк. Ҡатмарлы булмаған күнегеүҙәрҙән торған квест (йомаҡ, ребус сисергә, һорауҙарға яуап бирергә...) бәләкәстәрҙең күңеленә бигерәк хуш килер, ололарҙың да кәйефен күтәрер.

«Ҡар бабаймы, Шар бабаймы?» Һәр уйында ҡатнашыусыға өсәр шар, скотч, фломастер таратып бирелә. Кем, шарҙарҙы шартлатмай ғына, иң тәүҙә ҡар бабай эшләп ҡуйыр?

«Шыршы ҡупшы кейенгән». Барыһына ла билдәле йырҙы алабыҙ. Һәр кем уны алдан билдәләнгән герой (ҡуян, айыу, әтәс...) булып йырлап күрһәтә.

«12 – серле һан». Алдан бүлмәлә 12-шәр әйбер (кәнфит, ҡалаҡ, төймә, тимер аҡса...) таратып һалына. Команда буйынса һәр кем үҙенә «бүленгән» нәмәне эҙләй. Кем беренсе 12-һен дә табыр?

«Боҙҙо кем иретер?» Һәр кемгә берешәр боҙ шаҡмағы һәм коктейль көпшәһе бирелә. Көпшә аша өрөп, боҙҙо иретергә кәрәк. Кем тиҙерәк?

«Кем килештерә?» Берәү хәрәкәттәр ярҙамында Яңы йыл, ҡыш темаһына ниндәйҙер ғәмәлде башҡарыуын күрһәтә (шыршы биҙәй, конкиҙа йә саңғыла шыуа, бейәләй кейә, ҡар бәрә, айыу өңөндә йоҡлай...). Башҡалар уны белергә тейеш.

«Яңы йыл оркестры». Һәр кемгә бер йыр бүлеп бирелә. Старт булыу менән барыһы ла үҙенең йырын башлай. Бурыс – буталмай ғына йырҙы тамамлап ҡуйыу.