Башҡортостандың киң мәғлүмәт саралары вәкилдәре менән осрашыу

12 августа Башҡортостан Башлығы Радий Хәбиров төбәктең киң мәғлүмәт саралары вәкилдәре менән осрашты. Көн тәртибендә – республиканың ижтимағи-сәйәси һәм социаль-иҡтисади үҫеше мәсьәләләре.

Башҡортостан Башлығы, халыҡ менән асыҡ диалог булдырыу һәм ҡабул ителгән ҡарарҙарҙың асылын ентекле аңлатыу мөһим, тип һыҙыҡ өҫтөнә алды – бигерәк тә еңел булмаған осорҙа.

– Власть кешеләргә яҡыная бара, ни өсөн теге йәки был ҡарарҙар ҡабул ителеүен аныҡ аңлата, – тип билдәләне төбәк етәксеһе Радий Хәбиров осрашыу йомғаҡтары буйынса. – Киң мәғлүмәт саралары республика халҡына ваҡиғаларҙың асылын еткерә. Шуға күрә беҙ бер нисә сәғәт дауамында төрлө темаларҙы ентекләп тикшерҙек, ни өсөн барыһы ла тап шулай килеп сығыуын аңлаттыҡ. Ә көнүҙәк темалар бөгөн байтаҡ.