Бүләковтар Шәжәрә байрамына йыйылды

Учалы районы Мәҫкәү ауылында борон Ғәбдрәшит Шәрипов тигән бик бай һәм уҡымышлы кеше йәшәгән. Өс ҡатыны, егермеләп балаһы булған. Балаларының балалары тыуып, бер ейәне Бүләкҡужа исемле булып, унан киткән дә инде Бүләковтар фамилияһы. Мәҫкәү ауылында йәшәүселәрҙең күбеһе ошо нәҫелдән сыҡҡан. Бөтә республика буйлап таралып, барыһы ла матур итеп эшләй, йәшәй, балалар үҫтерә. Ошо көндәрҙә туғандар бер-береһе менән күрешеп, хәтирәләргә бирелеп, балаларҙы таныштырып алыу маҡсатында Мәҫкәү ауылына йыйылды.

Байрамға Бүләкҡужаның ейәндәре Танһыҡбай, Мөғәллим, Алсынбай, Ҡасим, ейәнсәре Мөхәдисәнән таралған бер нисә быуын вәкилдәре килгәйне. Динислам Бүләков менән Лилиә Фазлетдинова байрамды күңелле генә алып барҙы: туғандар менән таныштырҙы, иң оло һәм иң кесе Бүләковтарҙы билдәләне. Әйткәндәй, тап Динислам Раил улы – ошо осрашыуҙы ойоштороу идеяһын тәҡдим итеүсе. Уның уйын Рәмил Ханнан улы, Гөлгөнә Ғәзнәүи ҡыҙы, Лилиә Раил ҡыҙы күтәреп алып, бергәләп башҡарып сыҡты. Әлбиттә, ауылда ла ярҙам итеүселәр күп булды: яландағы үләнде сабып әҙерләргә, сәхнә ҡуйырға, уйындар өсөн майҙансыҡты таҙартырға, бүләктәр алырға кәрәк ине.
Баннерға баҫылған шәжәрәлә 500-ҙән ашыу кеше теркәлгән, ул һаман да тулыландырыу өҫтөндә. Килен, кейәүҙәр иһә айырым баҫылған һәлмәк кенә китапҡа яҙылған.
Бүләковтар таланттарға бай. Ҡунаҡтар йыр-бейеүҙән төҙөлгән дәртле концерт ҡарап кинәнде. Балалар эргәләге Урал йылғаһында йөҙөп рәхәтләнде, төрлө уйындар уйнаны. 200-ләп кеше йыйылған Урал буйы гөрләп торҙо. Төрлө район-ҡаланан килгән балаларҙың, үҫмерҙәрҙең бер-береһе менән танышып аралаша башлауҙарын күреп һөйөндөк. Бүләковтар шәжәрәһе ҙурая, тормош дауам итә.

Лилиә МӘҮЛИТОВА.

Автор фотолары