Спорт ҡауырһыны осонда: Өфөлә спорт журналистары форумы үтте

Форум республикала тәүге тапҡыр үткәрелә һәм киң мәғлүмәт саралары, профессиональ клубтарҙың матбуғат хеҙмәттәре, республиканың спорт федерациялары вәкилдәрен йыйҙы. Башҡортостан хөкүмәте вице — премьеры-спорт министры Руслан Хәбибов, форумда ҡатнашыусыларҙы сәләмләп, спорт журналистарының илдең медиа көн тәртибен формалаштырыуҙа мөһим роль уйнауын билдәләне.

• "Башҡортостан илдең алдынғы спорт төбәктәренең береһе булып тора. Һуңғы биш йылда төбәктә халыҡ-ара кимәлдәге бер нисә ҙур спорт объекты сафҡа индерелде. Беҙ меңәрләгән спорт майҙансыҡтары булдыра алабыҙ, әммә был спорт майҙансыҡтарында балаларыбыҙ, өлкән быуын шөғөлләнерме? Хәҙер беҙҙең өсөн һеҙҙең менән бергә республика халҡын ошо объекттарға йәлеп итеү мөһим, халыҡҡа мәғлүмәт еткереүҙә һеҙҙең нисек ярҙам итеүегеҙ мөһим. Бөгөнгө осрашыуыбыҙ был йәһәттән тағы ла көслөрәк, һөҙөмтәлерәк булырға мөмкинлек бирер тип уйлайым», — тине Руслан Хәбибов.

Сараның кульминацион нөктәһе булып Башҡортостанда спортты яҡтыртҡан әүҙем журналистар Рәхмәт һәм Маҡтау хаттары менән бүләкләнеүе булды. Улар араһында “Башҡортостан ҡыҙы” журналы хеҙмәткәре лә бар.

Сығанаҡ, фото: "Башинформ"