Баш мөхәррир һүҙе ҮҘГӘРЕШТӘР МӘЛЕ

Ҡояш нығыраҡ ҡыҙҙырған, йәшеллек артҡан һайын үҙгәрге килә. Был бигерәк тә беҙгә – ҡатын-ҡыҙға хас. Тәбиғәт менән бергә яңырыумы, әллә биологик сәғәттең һәм гормональ фондың йоғонтоһомо – гүзәл зат үҙенә генә түгел, тирә-йүненә лә, биләмәһенә лә яңылыҡтар индерә. Йылы, яҡты энергия тулышыу һәм позитив кәйеф, ыңғай ваҡиғаларҙы йәлеп итеүгә ынтылыу өсөн иң беренсе аҙым, моғайын, йыйыштырыуҙыр. Йәшәгән ерҙе, йәғни, өйҙө таҙалап сығыу, тәҙрәләрҙе йыуыу, ҡыш ниндәйҙер сәбәптәр менән йыйылып киткән ваҡ-төйәктән арыныу. Веранданы, балконды, соланды, ихатаны ла бер ыңғайы йыйыштырып ҡуя ул хужабикәләр, шулай бит? Унан бөтөн ошо иркенлеккә, сафлыҡҡа ҡарай ҙа – ҡыуана, тантана итә. Тирә-яҡ мөхитенең тәртиптә булыуы уға сикһеҙ ҡәнәғәтлек килтерә.

Артабан ни эшләйбеҙ? Эйе, үҙебеҙгә тотонабыҙ. Кемдер прическаһын үҙгәртә, сәсенең төҫөн яңырта, берәүҙәр диетаға ултыра, икенселәр сағыуыраҡ, баҙығыраҡ кейемгә күсә, аҙымдар еңеләйә, эйәктәр күтәрелә төшә, ҡараштар нурлана. Эске көслө энергетик тулҡын тышҡа ла бәреп сыға. Ҡатын-ҡыҙ илһамланып йәшәргә – донъя көтөүгә тотона. Быға тиклем, йәғни һалҡын айҙарҙа, ул ғәҙәти тереклек иткән булһа, йылы килеү менән ижади процестарға ынтыла, алға китәһе пландар төҙөй.

Тәбиғәттән ҡасып булмай. Нисек кенә заман ҡарамағына ҡалһаҡ та, уның талаптарына яраҡлашһаҡ та, ер һынлы ерҙе йомшарырға ла орлоҡ шыттырырға мәжбүр иткән миҙгел беҙҙе лә үҙгәртә һәм яңырта. Һәм был һоҡланғыс та! Әйҙәгеҙ, үҫәйек, япраҡ ярайыҡ, сәскә атайыҡ, оя ҡорайыҡ, йәшәүгә мәҙхиә йырлайыҡ беҙ ҙә. Үҙгәрештәр осороноң айышына төшөнөп, уның файҙалы яҡтарын ҡулланып, матур һөҙөмтәләргә өлгәшеп ҡалайыҡ.

Миләүшә Ҡаһарманова.

Автор:

Читайте нас

Партнеры