Бәйге Онотолған ризыҡ. Ҡыҙыл эремсек

Өләсәйем аштары Фатима өләсәйем элек гел танһыҡҡа ыумас бешерә торғайны. Яҙ көнө уға балтырған, кесерткән турап һалһаң, витаминлы ризыҡ әҙер. Ашты тауыҡ һурпаһына ла бешерергә мөмкин. Ҡыҙыл эремсеге лә сәйгә ҡушып эселгән бер татлы тамаҡ булды. Бөгөн дә тәмдәре тел осонда ғына. Хәҙер инде үҙем балаларға әҙерләп ашатам.

Ҡыҙыл эремсек

10 литрҙай айыртылған һөттө ҡайнатам да, утын яйлатып, 2 литр ҡатыҡ ҡушам. Ул уҡмашып, эремсеккә әйләнгәс, икенсе кәстрүлгә ҡоям да утҡа ҡуям. Шулай иткәндә, төбө көймәй. Ҡыҙарғансы ҡайнатам, биш сәғәттәй ваҡыт үтә. Тишекле сүместә йә туҡыма тоҡсайға һалып һарҡытҡас, ҡағыҙға йәйеп һалып киптерәм. Ит турағыстан үткәрәм. Тәменсә шәкәр, май ҡушып йомарлайым.

Аштарығыҙ тәмле булһын!

Ғәлиә ХӘСӘНОВА.

Йылайыр районы,

Йомағужа ауылы.