+30 °С
Облачно
Аңлатабыҙ. Башҡортостан
22 Декабря 2025, 10:00
Әҙәби балҡыш «Һәр һалдат исемен йондоҙ, Үлемһеҙ йыр иткем килә...»
Быйыл – Бөйөк Еңеүҙең 80 йыллығын ҡаршылаған йыл һәр кемдең күңеленә тәрән эҙ ҡалдыра. Ҡан һәм күҙ йәштәре алып килгән һуғыш афәтен оноторға хаҡыбыҙ юҡ! Уның хаҡы – ҡыйралған хыялдар, тыумай ҡалған сабыйҙар, тол ҡатындар, яңғыҙ әсәләр, атайһыҙ балалар! Уның хаҡы – 27 миллион ҡорбан! Бөйөк Ватан һуғышына Башҡортостандан етмештән ашыу яҙыусы китә. Шуларҙың егерменән ашыуы – Сәғит Мифтахов, Али Карнай, Мәлих Харис, Төхвәт Морат, Хөсәйен Ҡунаҡбай, Низам Ҡәрип, Мөхәмәтйәр Хәй, Бәҙрүш Моҡамай, Сабир Кинйәкәй, Фәтих Кәрим, Сыңғыҙ Ханов, Мазһар Абдуллин, Баязит Дим, Зөфәр Мансуров, Зиннәт Ҡотоп, Ғайса Йосопов, Хәйретдин Мөжәй, Фазыл Хәбир, Әхмәт Шакири, Ғәли Әхмәти, Ғамир Дәүләтшин яу яланында ятып ҡала. Иҫән ҡайтҡандары үлемһеҙ әҫәрҙәр тыуҙырып, исемдәрен мәңгелеккә әҙәбиәт манзараһына яҙҙы. Шулар араһынан Хәниф Кәримдеңтьыуыуына быйыл 115 йыл. Уның әҫәрҙәре әле лә актуаль.
Хәниф Кәрим
Мин ҡайтырмын
Урамға сыҡһаң, баҡсаға ҡара,
Тыңла япраҡтар тибрәп шаулауын.
Хәтерлә яҙғы зәңгәр көндәрҙе,
Рәхәтлек солғар йәшлек һулауын.
Аралар йыраҡ һәм юлдар ауыр:
Ә мин ышанам: килер ҡауышыу!
Туптар шартлауы араһында ла
Ишетәм, бәғерем, саҡырыу тауышың.
Көт, мин ҡайтырмын шул уҡ юлдарҙан,
Һәм булыр һиңә иң ҙур бүләгем:
Дошманды еңеү һәм тапланмаған,
Яуҙа сыныҡҡан ҡайнар йөрәгем.
Ҡайғы болото ҡаплап китмәһен
Оҙаҡ көтөлгән осрау шатлығын:
Йәшлек сәскәһе шиңмәйсә булмаҫ,
Һаҡла һөйөүҙең һулымаҫ сафлығын.
Иртәнме, кисме – барыбер ҡайтырмын,
Дошман затынан таҙартып илде.
Үлемде аша атлап үтермен,
Еңеп ҡайтырмын, һағынып көт мине!
