Республика көнөндә 578 башҡорт уҡыусыһы «шайморатовсылар» рәтенә ҡабул ителде

Тантанала Башҡортостан Башлығы Радий Хәбиров ҡатнашты. Төбәк етәксеһе Рәсәй Геройы, генерал-майор Миңлеғәле Шайморатовтың һәйкәленә сәскәләр һалды. Хәтерегеҙгә төшөрәбеҙ, скульптура композицияһы өс йыл элек Республика көнөндә асылды. Ул 112-се Башҡорт Кавалерия Дивизияһы яугирҙарына һәм тыуған ил өсөн ғүмерен биргән барлыҡ ватандаштарына арналған.

Үҙенең сығышында республика Башлығы үҫеп килгән быуынды тәрбиәләү өсөн Миңлеғәле Шайморатовтың айырым ролен билдәләне һәм «шайморатов» кластары уҡыусыларына яҡшы кәңәштәр бирҙе.

- Бөгөн һеҙҙең өсөн үҙенсәлекле көн. Дәүләт байрамында, Республика көнөндә, һеҙ милли геройыбыҙ Миңлеғәле Шайморатовтың исемен ғорурлыҡ менән йөрөтөүселәрҙең ҙур ғаиләһенә инәһегеҙ, – тине Радий Хәбиров. - Был юғары хөрмәт һәм ҙур яуаплылыҡ. Һеҙ генералдың исемен генә түгел, ә 112-се Башҡорт кавалерия дивизияһының хәрби данын, уның яугирҙарының батырлыҡтарын мираҫ итеп алаһығыҙ. Күмәк батырлыҡ күрһәтеп, был легендар дивизия Дондан Эльбаға тиклем һуғыштар менән үтә. Ул Ҡыҙыл Армияның 78 яугир Советтар Союзы Геройы исеменә лайыҡ булған берҙән-бер берләшмәһе була. Ә бишәүһе Дан орденының тулы кавалерҙары була.